أم خالد

خالد...انت هنا يا حبيبي... انت ما متش... لا... انت لسة عايش... أنا أكيد بحلم... أيوة انت لسة عايش وهتدخل علي كمان شوية... وهتيجي... وهشوفك تاني... هبوسك واحضنك وأسمع صوتك وأشوف وشك... وشك؟ يابني... يا حبيبي... ازاي عملوا فيك كدة؟ ازاي جالهم قلب؟ ازاي ما صعبتش عليهم؟ عملتلهم ايه؟ ليه موتوك؟ ليه؟ طب... كانوا عملوا أي حاجة تانية وسابوك ما هما قادرين على كل حاجة. ازاي جالهم قلب؟ ما عندهمش ولاد؟ ما عندهمش اخوات؟ ما عندهمش قلب؟ ازاي جالهم قلب يمدوا ايدهم عليك؟ دمك وهو في ايديهم ما هزهمش؟ وصوتك وانت بتصرخ ما وقفهمش؟ و وشك... وشك اللي زي القمر ازاي عملوا فيه كدة؟ هيناموا بالليل ازاي؟ هياكلوا ويشربوا ازاي؟هيعيشوا ازاي؟ طب كانوا سابوك تعيش كانوا عملوا أي حاجة وسابوك تعيش يحرموني منك ليه؟ يا حبيبي يا ترى حسيت بايه؟ ندهت علي؟ ندهت على أمك؟ أكيد ندهت علي زي ما كنت بتنده علي لما الموجة تيجي عليك وانت صغير... أكيد ندهت علي وما لقتنيش... ما لقتش حد. يا ريتني كنت معاك... يا ريتني كنت بدالك... ياريتني أنا اللي اتضربت واتقتلت بس انت لا... يا ريتني كنت معاك... كنت حوشتهم عنك... كنت ما خلتهمش يلمسوا شعرة منك...كنت موتهم بايدي قبل ما يلمسوك. يا رب.. ليه أنا؟ ليه ابني أنا؟ ما الدنيا مليانة والبلد مليانة اشمعنى أنا؟ اشمعنى ابني أنا؟ وليه ولادهم يعيشوا وأنا ابني يموت؟ يا رب دة ظلم وانت مش ظالم... انت مش ظالم صح؟ طب لما انت مش ظالم سايبهم ليه؟ وسبتهم يعملوا كدة ليه؟ طب فهمني وأنا هسكت... والله هسكت ومش هتكلم ولا هعترض... بس فهمني ايه اللي بيحصل. طب رجعهولي تاني... والنبي رجعهولي تاني... مش انت قادر على كل شيء؟ طب رجعهولي وخدني بعد كدة بس أشوفه تاني.. أخده في حضني تاني... احضنه ولو خمس دقايق... طب دقيقة واحدة... دقيقة واحدة والله ...أشوفه بس... أشوف وشه قبل اللي عملوه. والله ماكنت اعرف انه هيحصله كل دة... والله لو كنت أعرف ما كنتش سيبته ثانية واحدة... ما كنتش أعرف انك هتسيبهم يعملوا فيه كدة... أنا ياما دعيتلك تحفظهولي وتباركلي فيه ماسمعتش ليه؟ سبتهم ليه؟ سبتهم يعملوا فيه كدة ليه؟ ما منعتهمش ليه؟ وسايبهم يقولوا عليه كدة ليه؟ وكله ظلم وانت عارف انه ظلم. أنا مش عارفة أعمل ايه... أكره مين؟ أكره البلد اللي سايبة ولادها تتبهدل؟ ولا أكره الناس اللي ما حدش منهم حاش عنه؟ ولا أكره الزمن اللي الناس بتتقتل فيه في الشوارع في عز الضهر؟ ولا أكره نفسي عشان ما كنتش معاه؟ أروح فين؟ أمشي ازاي في الشارع اللي اتقتل فيه؟ أخطي ازاي على دمه؟ أدوس ازاي علي التراب اللي اداس فيه؟ أنا مش عايزة أعيش... خدني زي ما خدته يا اما تجيبلي حقي من اللي قتلوه... وريني فيهم وفي ولادهم اللي عملوه في ابني. يا رب... انت فين؟ انت فين بقى؟؟؟